آیت 47:   وَلْیَحْکُمْ اَہْلُ الْاِنْجِیْلِ بِمَـآ اَنْزَلَ اللّٰہُ فِیْہِ:   ،،اور چاہیے کہ انجیل کے ماننے والے فیصلہ کریں  اس کے مطابق جو اللہ نے اس میں  نازل کیا ہے۔ ،،

             وَمَنْ لَّـمْ یَحْکُمْ بِمَآ اَنْزَلَ اللّٰہُ فَاُولٰٓئِکَ ہُمُ  الْفٰسِقُوْنَ:   ،،اور جو لوگ نہیں  فیصلے کرتے اللہ کے اُتارے ہوئے احکامات و قوانین کے مطابق،  وہی تو فاسق ہیں۔ ،،

            وہی تو سرکش ہیں ،  وہی تو نافرمان ہیں ،  وہی تو ناہنجار ہیں ۔  غور کیجیے ایک رکوع میں  تین دفعہ یہ الفاظ دہرائے گئے ہیں:

 وَمَنْ لَّمْ یَحْکُمْ بِمَآ اَنْزَلَ اللّٰہُ فَاُولٰٓئِکَ ہُمُ الْکٰفِرُوْنَ. 

 وَمَنْ لَّمْ یَحْکُمْ بِمَآ اَنْزَلَ اللّٰہُ فَاُولٰٓئِکَ ہُمُ الظّٰلِمُوْنَ. 

 وَمَنْ لَّمْ یَحْکُمْ بِمَآ اَنْزَلَ اللّٰہُ فَاُولٰٓئِکَ ہُمُ الْفٰسِقُوْنَ. 

            ان آیاتِ قرآنیہ کو سامنے رکھیے اور ملت ِ اسلامیہ کی موجودہ کیفیت کا جائزہ لیجیے کہ دنیا میں  کتنے ممالک ہیں ، جہاں  اللہ کا قانون نافذ ہے؟ آج روئے زمین پر کوئی ایک بھی ملک ایسا نہیں  ہے جہاں  شریعت ِاسلامی پورے طور پر نافذ ہو اور اسلام کا مکمل نظام قائم ہو۔  اگرچہ ہم انفرادی اعتبار سے مسلمان ہیں  لیکن ہمارے نظام کافرانہ ہیں ۔