المائدة

شروع اللہ کے نام سے جو بیحد مہربان نہایت رحم والا ہے 

اے ایمان والو ! معاہدوں کو پورا کرو۔ تمہارے لئے وہ چوپائے حلال کر دیئے گئے ہیں جو مویشیوں میں داخل (یا ان کے مشابہ) ہوں ، سوائے اُن کے جن کے بارے میں تمہیں پڑھ کر سنایا جائے گا، بشرطیکہ جب تم اِحرام کی حالت میں ہو اس وقت شکار کو حلال نہ سمجھو۔ اﷲ جس چیز کا ارادہ کرتا ہے اس کا حکم دیتا ہے

اے ایمان والو ! نہ اﷲ کی نشانیوں کی بے حرمتی کرو، نہ حرمت والے مہینے کی، نہ ان جانوروں کی جو قربانی کیلئے حرم لے جائے جائیں ، نہ ان پٹوں کی جو ان کے گلے میں پڑے ہوں ، اور نہ ان لوگوں کی جو اﷲ کا فضل اور اس کی رضامندی حاصل کرنے کی خاطر بیت حرام کا ارادہ لے کر جارہے ہوں۔ اور جب تم احرام کھول دو تو شکار کر سکتے ہو۔ اور کسی قوم کے ساتھ تمہاری یہ دشمنی کہ انہوں نے تمہیں مسجدِ حرام سے روکا تھا تمہیں اس بات پر آمادہ نہ کرے کہ تم (ان پر) زیادتی کرنے لگو۔ اور نیکی اور تقویٰ میں ایک دوسرے کے ساتھ تعاون کرو، اور گناہ اور ظلم میں تعاون نہ کرو، اور اﷲ سے ڈرتے رہو۔ بیشک اﷲ کا عذاب بڑا سخت ہے

تم پر مردار جانور اور خون اور سوَر کا گوشت اور وہ جانور حرام کر دیا گیا ہے جس پر اﷲ کے سوا کسی اور کا نام پکارا گیا ہو، اوروہ جو گلا گھٹنے سے مرا ہو، اور جسے چوٹ مارکر ہلاک کیا گیا ہو، اور جو اُوپر سے گر کر مرا ہو، اور جسے کسی جانور نے سینگ مارکر ہلاک کیا ہو، اور جسے کسی درندے نے کھالیا ہو، اِلّا یہ کہ تم (اس کے مرنے سے پہلے) اس کو ذبح کر چکے ہو، اور وہ (جانور بھی حرام ہے) جسے بتوں کی قربان گاہ پر ذبح کیا گیا ہو۔ اور یہ بات بھی (تمہارے لئے حرام ہے) کہ تم جوے کے تیروں سے (گوشت وغیرہ) تقسیم کرو۔ یہ ساری باتیں سخت گناہ کی ہیں ۔ آج کافرلوگ تمہارے دین (کے مغلوب ہونے) سے نااُمید ہوگئے ہیں ، لہٰذا ان سے مت ڈرو، اور میرا ڈر دِل میں رکھو۔ آج میں نے تمہارے لئے تمہارا دین مکمل کر دیا، تم پر اپنی نعمت پوری کر دی، اور تمہارے لئے اسلام کو دین کے طورپر (ہمیشہ کیلئے) پسند کر لیا۔ (لہٰذا اس دین کے احکام کی پوری پابندی کرو) ہاں جو شخص شدید بھوک کے عالم میں بالکل مجبور ہوجائے (اور اس مجبوری میں ان حرام چیزوں میں سے کچھ کھالے) ، بشرطیکہ گناہ کی رغبت کی بنا پر ایسا نہ کیا ہو، تو بیشک اﷲ بہت معاف کرنے والا، بڑا مہربان ہے

لوگ تم سے پوچھتے ہیں کہ ان کیلئے کونسی چیزیں حلال ہیں ؟ کہہ دو کہ ’’ تمہارے لئے تمام پاکیزہ چیزیں حلال کی گئی ہیں ۔ اور جن شکاری جانوروں کو تم نے اﷲ کے بتائے ہوئے طریقے کے مطابق سکھا سکھا کر (شکار کیلئے) سدھا لیا ہو، وہ جس جانور کو (شکار کر کے) تمہارے لئے روک رکھیں ، اس میں سے تم کھا سکتے ہو، اور اس پر اﷲ کا نام لیا کرو اور اﷲ سے ڈرتے رہو۔ اﷲ جلد حساب لینے والا ہے

آج حلال ہوئیں تم کو سب ستھری چیزیں اور اہل کتاب کا کھانا تم کو حلال ہے اور تمہارا کھانا ان کو حلال ہے اور حلال ہیں تم کو پاک دامن عورتیں مسلمان اور پاک دامن عورتیں ان میں سے جن کو دی گئی کتاب تم سے پہلے جب دو ان کو مہر ان کے قید میں لانے کو نہ مستی نکالنے کو اور نہ چھپی آشنائی کرنے کو  اور جو منکر ہوا ایمان سے تو ضائع ہوئی محنت اس کی اور آخرت میں وہ ٹوٹے والوں میں ہے 

اے ایمان والو ! جب تم نماز کیلئے اُٹھو تو اپنے چہرے، اور کہنیوں تک اپنے ہاتھ دھو لو، اور اپنے سروں کا مسح کرو، اور اپنے پاؤں (بھی) ٹخنوں تک (دھو لیا کرو) ۔ اور اگر تم جنابت کی حالت میں ہو تو سارے جسم کو (غسل کے ذریعے) خوب اچھی طرح پاک کرو۔ اور اگر تم بیمار ہو یا سفر پر ہو یا تم میں سے کوئی قضائے حاجت کر کے آیا ہو، یا تم نے عورتوں سے جسمانی ملاپ کیا ہو، اور تمہیں پانی نہ ملے تو پاک مٹی سے تیمم کرو، اور اپنے چہروں اور ہاتھوں کا اس (مٹی) سے مسح کر لو۔ اﷲ تم پر کوئی تنگی مسلط کرنا نہیں چاہتا، لیکن یہ چاہتا ہے کہ تم کو پاک صاف کرے، اور یہ کہ تم پر اپنی نعمت تمام کر دے، تاکہ تم شکر گذار بنو

اﷲ نے تم پر جو انعام فرمایا ہے اسے اور اُس عہد کو یاد رکھو جو اس نے تم سے لیا تھا۔ جب تم نے کہا تھا کہ : ’’ ہم نے (اﷲ کے احکام کو) اچھی طرح سن لیا ہے، اور اطاعت قبول کر لی ہے۔ ‘‘ اور اﷲ سے ڈرتے رہو۔ اﷲ یقینا سینوں کے بھید سے پوری طرح باخبر ہے

اے ایمان والو ! ایسے بن جاؤ کہ اﷲ (کے احکام کی پابندی) کیلئے ہر وقت تیار ہو، (اور) انصاف کی گواہی دینے والے ہو۔ اور کسی قوم کی دشمنی تمہیں اس بات پر آمادہ نہ کرے کہ تم ناانصافی کرو۔ انصاف سے کام لو، یہی طریقہ تقویٰ سے قریب تر ہے۔ اور اﷲ سے ڈرتے رہو۔ اﷲ یقینا تمہارے تمام کاموں سے پوری طرح باخبر ہے

جو لوگ ایمان لائے ہیں اور جنہوں نے نیک عمل کئے ہیں ان سے اﷲ نے وعدہ کیا ہے کہ (آخرت میں ) ان کو مغفرت اور زبردست ثواب حاصل ہوگا