اب آگے قتل ِعمد کے قانون کے متعلق تفصیلات کا ذکر ہے ۔

آیت 93:  وَمَنْ یَّقْتُلْ مُؤْمِنًا مُّتَعَمِّدًا فَجَزَآؤُہ جَہَنَّمُ خَالِدًا فِیْہَا: ’’اور جو کوئی قتل کرے گا کسی مؤمن کو جان بوجھ کر تواس کا بدلہ جہنّم ہے جس میں وہ ہمیشہ رہے گا‘‘

             وَغَضِبَ اللّٰہُ عَلَیْہِ وَلَعَنَہ وَاَعَدَّ لَہ عَذَابًا عَظِیْمًا: ’’اور اللہ کا غضب اس پر ہوگا‘ اور اللہ نے اس پر لعنت فرمائی ہے اور اس کے لیے بہت بڑا عذاب تیار کر رکھاہے ۔‘‘

            جیسا کہ آغازِ سورۃ میں ذکر ہوا تھا کہ حرمت ِجان اور حرمت ِمال کے تصور پر معاشرے کی بنیاد قائم ہے ۔ لہٰذا ایک مسلمان کا قتل کر دینا اللہ کے ہاں ایک بہت سنجیدہ معاملہ ہے ۔ یہی وجہ ہے کہ سورۃ المائدہ (آیت: 32) میں قتل ِنا حق کو پوری نوعِ انسانی کے قتل کے مترادف قرار دیا گیا ہے۔ اس لیے کہ قاتل نے حرمت ِجان کو پامال کر کے شجر ِتمد ّن کی گویا جڑ کاٹ دی‘ اور اس کا یہ فعل ایسے ہی ہے جیسے اس نے پوری انسانی نسل کو موت کے گھاٹ اتار دیا۔ اس سے اندازہ کیجئے کہ ہمارے ہاں ایمان واسلام کتنا کچھ ہے اور انسانی جان کی قدر و قیمت کیا ہے۔ آج ہمارے معاشرے میں قتل ِعمد کے واقعات روز مرہ کا معمول بن چکے ہیں اورانسانی جان مچھر مکھی کی جان کی طرح ارزاں ہو چکی ہے۔