فاطر

تمام تر تعریف اﷲ کی ہے جو آسمانوں اور زمین کا پیدا کرنے والا ہے، جس نے اُن فرشتوں کو پیغام لے جانے کیلئے مقرر کیا ہے، جو دو دو، تین تین اور چار چار پروں والے ہیں ۔ وہ پیدائش میں جتنا چاہتا ہے اضافہ کر دیتا ہے۔ بیشک اﷲ ہر چیز کی قدرت رکھنے والا ہے

جس رحمت کو اﷲ لوگوں کیلئے کھول دے، کوئی نہیں ہے جو اُسے روک سکے، اور جسے وہ روک لے، تو کوئی نہیں ہے جو اس کے بعد اُسے چھڑا سکے۔ اور وہی ہے جو اِقتدار کا بھی مالک ہے، حکمت کا بھی مالک

اے لوگو ! یاد کرو ان نعمتوں کو جو اﷲ نے تم پر نازل کی ہیں ۔ کیا اﷲ کے سوا کوئی اور خالق ہے جو تمہیں آسمان اور زمین سے رزق دیتا ہو؟ اُس کے سوا کوئی معبود نہیں ہے۔ پھر آخر تم کہاں اوندھے چلے جا رہے ہو؟

اور (اے پیغمبر !) اگر یہ لوگ تمہیں جھٹلا رہے ہیں ، تو تم سے پہلے بھی پیغمبروں کو جھٹلایا گیا ہے۔ اور تمام معاملات آخر کار اﷲ ہی کی طرف لوٹائے جائیں گے

اے لوگو ! یقین جانو کہ اﷲ کا وعدہ سچا ہے، لہٰذا تمہیں یہ دُنیوی زندگی ہر گز دھوکے میں نہ ڈالے، اور نہ اﷲ کے معاملے میں تمہیں وہ (شیطان) دھوکے میں ڈالنے پائے جو بڑا دھوکے باز ہے

یقین جانو کہ شیطان تمہارا دُشمن ہے، اس لئے اُس کو دُشمن ہی سمجھتے رہو۔ وہ تو اپنے ماننے والوں کو جو دعوت دیتا ہے، وہ اس لئے دیتا ہے تاکہ وہ دوزخ کے باسی بن جائیں

جن لوگوں نے کفر اپنا لیا ہے، ان کیلئے شدید عذاب ہے، اور جو لوگ ایمان لے آئے ہیں ، اور اُنہوں نے نیک عمل کئے ہیں ، ان کیلئے مغفرت ہے، اور بڑا اَجر !

بھلا بتاؤ کہ جس شخص کی نظروں میں اس کی بدعملی ہی خوشنما بنا کر پیش کی گئی ہو، جس کی بنا پر وہ اس بدعملی کو اچھا سمجھتا ہو، (وہ نیک آدمی کے برابر کیسے ہوسکتا ہے؟) کیونکہ اﷲ جس کو چاہتا ہے، راستے سے بھٹکا دیتا ہے، اور جس کو چاہتا ہے ٹھیک راستے پر پہنچا دیتا ہے۔ لہٰذا (اے پیغمبر !) ایسا نہ ہو کہ ان (کافروں ) پر افسوس کے مارے تمہاری جان ہی جاتی رہے۔ یقین رکھو کہ جو کچھ یہ کر رہے ہیں ، اﷲ اُسے خوب جانتا ہے

اور اﷲ ہی ہے جو ہوائیں بھیجتا ہے، پھر وہ بادلوں کو اُٹھاتی ہیں ، پھر ہم اُنہیں ہنکا کر ایک ایسے شہر کی طرف لے جاتے ہیں جو (قحط سے) مردہ ہو چکا ہوتا ہے، پھر ہم اُس (بارش) کے ذریعے مردہ زمین کو نئی زندگی عطا کرتے ہیں ۔ بس اسی طرح انسانوں کی دوسری زندگی ہوگی

جو شخص عزت حاصل کرنا چاہتا ہو، تو تمام تر عزت اﷲ کے قبضے میں ہے۔ پاکیزہ کلمہ اُسی کی طرف چڑھتا ہے، اور نیک عمل اُس کو اُوپر اُٹھاتا ہے۔ اور جو لوگ بُری بُری مکاریاں کرر ہے ہیں ، ان کو سخت عذاب ہوگا، اور اُن کی مکاری ہی ہے جو ملیا میٹ ہوجائے گی