آیت 156:  یٰٓـــاَیـُّـہَا الَّذِیْنَ اٰمَنُوْا لاَ تَـکُوْنُوْا کَالَّذِیْنَ کَفَرُوْا:  ’’اے اہل ایمان! تم اُن لوگوں کی مانند نہ ہو جانا جنہوں نے کفر کیا‘‘

             وَقَالُـوْا لِاِخْوَانِہِمْ اِذَا ضَرَبُوْا فِی الْاَرْضِ اَوْ کَانُوْا غُـزًّی لَّــوْ کَانُوْا عِنْدَنَا مَا مَاتُـوْا وَمَا قُتِلُـوْا:  ’’اور جنہوں نے اپنے بھائیوں کے بارے میں جبکہ وہ زمین میں سفر پر نکلے ہوئے تھے یا کسی جہاد میں شریک تھے (اور وہاں ان کا انتقال ہو گیا) کہا کہ اگر وہ ہمارے پاس ہوتے تو نہ مرتے‘ نہ قتل ہوتے۔‘‘

            ہر شخص کی موت کا وقت تو معین ہے۔ وہ اگر تمہاری گود میں بیٹھے ہوں تب بھی موت آجائے گی۔ چاہے وہ بہت ہی مضبوط پہرے والے قلعوں میں ہوں موت تو وہاں بھی پہنچ جائے گی ۔ تو تم اس طرح کی باتیں نہ کرو۔ یہ تو کافروں کے انداز کی باتیں ہیں کہ اگر ہمارے پاس ہوتے اور جنگ میں نہ جاتے تو بچ جاتے۔ یہ ساری باتیں درحقیقت ایمان کے منافی ہیں۔ ایک حدیث میں آتا ہے کہ رسول اللہ  نے فرمایا: «فَاِنَّ لَـوْ تَفْتَحُ عَمَلَ الشَّیْطَانِ» ’’کاش کا لفظ شیطان کے عمل کا دروازہ کھول دیتا ہے‘‘۔ یعنی یہ کہنا کہ کاش ایسے ہو جاتا تو یوں ہو جاتا‘اس کلمہ ہی سے شیطان کا عمل شروع ہو جاتا ہے۔ جو ہوا اس لیے ہواکہ اللہ تعالیٰ کو اس کا ہونا منظور تھا‘ اس کی حکمتیں اسے معلوم ہیں‘ ہم اس کی حکمت کا احاطہ نہیں کر سکتے۔

             لِـیَجْعَلَ اللّٰہُ ذٰلِکَ حَسْرَۃً فِیْ قُـلُوبِہِمْ:  ’’(یہ بات اس لیے ان کی زبان پر آتی ہے) تاکہ اللہ اس کو اُن کے دلوں میں حسرت کا باعث بنا دے‘‘۔

            اس قسم کی باتوں سے اللہ تعالیٰ ان کے دلوں میں حسرت کی آگ جلا دیتا ہے۔ یہ بھی گویا ان کے کفر کی سزا ہے۔

             وَاللّٰہُ یُحْی وَیُمِیْتُ:’’اور دیکھو اللہ ہی زندہ رکھتا ہے اور وہی موت وارد کرتاہے۔‘‘

             وَاللّٰہُ بِمَا تَعْمَلُوْنَ بَصِیْرٌ: ’’اور جو کچھ تم کر رہے ہو اللہ اسے دیکھ رہا ہے۔‘‘