آل عمران

الم 

اﷲ وہ ہے جس کے سوا کوئی معبود نہیں، جو سدا زندہ ہے، جو پوری کائنات سنبھالے ہوئے ہے

اس نے تم پر وہ کتاب نازل کی ہے جو حق پر مشتمل ہے، جو اپنے سے پہلی کتابوں کی تصدیق کرتی ہے، اور اسی نے تورات اور انجیل اتاریں

جو اس سے پہلے لوگوں کیلئے مجسم ہدایت بن کر آئی تھی، اور اسی نے حق و باطل کو پرکھنے کا معیار نازل کیا ۔ بیشک جن لوگوں نے اﷲ کی آیتوں کا انکار کیا ہے ان کیلئے سخت عذاب ہے، اور اﷲ زبردست اقتدار کا مالک اور برائی کا بدلہ دینے والا ہے

یقین رکھو کہ اﷲ سے کوئی چیز چھپ نہیں سکتی، نہ زمین میں نہ آسمان میں

وہی ہے جو ماؤں کے پیٹ میں جس طرح چاہتا ہے تمہاری صورتیں بناتا ہے ۔ اس کے سوا کوئی معبود نہیں ۔ وہ زبردست اقتدار کا بھی مالک ہے، اعلیٰ درجے کی حکمت کا بھی

(اے رسول !) وہی اﷲ ہے جس نے تم پر کتاب نازل کی ہے جس کی کچھ آیتیں تو محکم ہیں جن پر کتاب کی اصل بنیاد ہے، اور کچھ دوسری آیتیں متشابہ ہیں ۔ اب جن لوگوں کے دلوں میں ٹیڑھ ہے وہ ان متشابہ آیتوں کے پیچھے پڑے رہتے ہیں تاکہ فتنہ پیدا کریں اور ان آیتوں کی تأویلات تلاش کریں، حالانکہ ان آیتوں کا ٹھیک ٹھیک مطلب اﷲ کے سوا کوئی نہیں جانتا، اور جن لوگوں کا علم پختہ ہے وہ یہ کہتے ہیں کہ: ’’ ہم اس (مطلب) پر ایمان لاتے ہیں (جو اﷲ کو معلوم ہے) ۔ سب کچھ ہمارے پروردگار ہی کی طرف سے ہے۔‘‘ اور نصیحت وہی لوگ حاصل کرتے ہیں جو عقل والے ہیں

(ایسے لوگ یہ دعا کرتے ہیں کہ :) ’’ اے ہمارے رب! تو نے ہمیں جو ہدایت عطا فرمائی ہے اس کے بعد ہمارے دلوں میں ٹیڑھ پیدا نہ ہونے دے، اور خاص اپنے پاس سے ہمیں رحمت عطا فرما ۔ بیشک تیری، اور صرف تیری ذات وہ ہے جو بے انتہا بخشش کی خوگر ہے

ہمارے پروردگار ! تو تمام انسانوں کو ایک ایسے دن جمع کرنے والا ہے جس کے آنے میں کوئی شک نہیں ۔ ‘‘ بیشک اﷲ اپنے وعدے کی خلاف ورزی نہیں کرتا

حقیقت یہ ہے کہ جن لوگوں نے کفر اپنا لیا ہے، اﷲ کے مقابلے میں نہ ان کی دولت ان کے کچھ کام آئے گی، نہ ان کی اولاد، اور وہی ہیں جو آگ کا ایندھن بن کر رہیں گے