آیت 83:   وَاِذْ اَخَذْنَا مِیْثَاقَ بَنِیْٓ اِسْرَآءِیْلَ لاَ تَعْبُدُوْنَ اِلاَّ اللّٰہَ:  اور یاد کرو جب ہم نے بنی اسرائیل سے عہد لیا تھا کہ تم نہیں عبادت کرو گے کسی کی سوائے اللہ کے۔  

             وَبِالْوَالِدَیْنِ اِحْسَانًا:   اور والدین کے ساتھ نیک سلوک کرو گے ،

            اللہ کے حق کے فوراً بعد والدین کے حق کا ذکر قرآن مجید میں چار مقامات پر آیا ہے۔ اُن میں سے ایک مقام یہ ہے ۔

             وَّذِی الْقُرْبٰی:  اور قرابت داروں کے ساتھ بھی (نیک سلوک کرو گے)

             وَالْیَتٰمٰی:   اور یتیموں کے ساتھ بھی

             وَالْمَسٰکِیْنِ:   اور محتاجوں کے ساتھ بھی  

             وَقُوْلُوْا لِلنَّاسِ حُسْنًا:  اور لوگوں سے اچھی بات کہو  

            امر بالمعروف کر تے  رہو۔ نیکی کی دعوت دیتے رہو۔

             وَّاَقِیْمُوا الصَّلٰوۃَ وَاٰتُوا الزَّکٰوۃَ:   اور نماز قائم رکھو اور زکوٰۃ ادا کرو۔  

            یہ بنی اسرائیل سے معاہدہ ہو رہا ہے ۔

             ثُمَّ تَوَلَّـیْتُمْ اِلاَّ قَلِیْلاً مِّنْکُمْ:   پھر تم (اس سے) پھر َگئے سوائے تم میں سے تھوڑے سے لوگوں کے  ،

             وَاَنْتُمْ مُّعْرِضُوْنَ:    اور تم ہو ہی پھر جانے والے۔  

            تمہاری یہ عادت گویا طبیعت ِثانیہ ہے۔