آیت 171:    وَمَثَلُ الَّذِیْنَ کَفَرُوْا کَمَثَلِ الَّذِیْ یَنْعِقُ بِمَا لاَ یَسْمَعُ اِلاَّ دُعَآءًا وَّنِدَآءًا:   اور ان لوگوں کی مثال جنہوں نے کفر کیا ، ایسی ہے جیسے کوئی شخص ایسی چیز کو پکارے جو پکار اور آواز کے سوا کچھ نہ سمجھتی ہو۔   

            جو لوگ محض باپ دادا کی تقلید میں اپنے کفر پر اَڑ گئے ہیں اُن کی تشبیہہ جانوروں سے دی گئی ہے جنہیں پکارا جائے تو وہ پکارنے والے کی پکاراور آواز تو سنتے ہیں،  لیکن سوچنے سمجھنے کی صلاحیت سے بالکل عاری ہوتے ہیں۔  تمثیل سے مراد یہ ہے کہ رسول اللہ اور مسلمان ان لوگوں کو سمجھانے کی کوشش کر رہے ہیں لیکن وہ اس دعوت پر کان دھرنے کو تیار نہیں ہیں۔  

             صُمٌّم بُـکْمٌ عُمْیٌ فَہُمْ لاَ یَعْقِلُوْنَ:   وہ بہرے بھی ہیں،  گونگے بھی ہیں،  اندھے بھی ہیں،  پس وہ عقل سے کام نہیں لیتے۔