آیت 132:   وَوَصّٰی بِہَآ اِبْرهِيْمُ بَنِیْہِ وَیَعْقُوْبُ:   اور اسی کی وصیت ّکی تھی ابراہیم   نے اپنے بیٹوں کو اور یعقوب نے بھی۔  

            آگے وہ نصیحت بیان ہو رہی ہے :

             یٰبَنِیَّ اِنَّ اللّٰہَ اصْطَفٰی لَکُمُ الدِّیْنَ:   اے میرے بیٹو! اللہ  نے تمہارے لیے یہی دین پسند فرمایا ہے  

             فَلاَ تَمُوتُنَّ اِلاَّ وَاَنْتُمْ مُّسْلِمُوْنَ:  پس تم ہرگز نہ مرنا مگر مسلمان!  

            دیکھنا تمہیں موت نہ آنے پائے،  مگر فرماں برداری کی حالت میں! یہی بات سورئہ آلِ عمران میں مسلمانوں سے خطاب کر کے فرمائی گئی:  (یٰٓــاَیُّہَا الَّذِیْنَ اٰمَنُوا اتَّقُوا اللّٰہَ حَقَّ تُقٰتِہ وَلاَ تَمُوْتُنَّ اِلاَّ وَاَنْتُمْ مُّسْلِمُوْنَ).   «اے لوگو جو ایمان لائے ہو ! اللہ کا تقویٰ اختیار کرو جیسا کہ اُس کے تقویٰ کا حق ہے اور تم کو موت نہ آئے  مگر اس حال میں کہ تم مسلم ہو»۔ اور فرمایا:  (اِنَّ الدِّیْنَ عِنْدَ اللّٰہِ الْاِسْلاَمُ)  (آیت: 19)  «یقینا دین تو اللہ کے نزدیک صرف اسلام ہے »۔ مزید فرمایا: (وَمَنْ یَّــبْتَغِ غَیْرَ الْاِسْلاَمِ دِیْنًا فَلَنْ یُّقْبَلَ مِنْہُ)   (آیت: 85)  «اور جو کوئی اسلام کے سوا کوئی اور دین اختیار کرنا چاہے تو اس سے وہ ہرگز قبول نہ کیا جائے گا»۔