آیت ۸۸:  قَالَ یٰقَوْمِ اَرَءَیْتُمْ اِنْ کُنْتُ عَلٰی بَیِّنَۃٍ مِّنْ رَّبِّیْ:  «آپ  نے فرمایا : اے میری قوم کے لوگو! ذرا سوچو کہ اگرمیں (پہلے بھی) اپنے رب کی طرف سے بیّنہ پر تھا»

            حضرت شعیب نے وہی بات فرمائی جو دوسرے انبیاء و رسل اپنی اپنی قوم سے فرماتے آئے تھے کہ تمہارے درمیان رہتے ہوئے میرا کردار اور اخلاق پہلے بھی مثالی تھا، میں اس معاشرے میں ایک شریف النفس اور سلیم الفطرت انسان کے طور پر معروف تھا۔

             وَرَزَقَنِیْ مِنْہُ رِزْقًا حَسَنًا:  «اور اللہ نے اپنے پاس سے مجھے اچھا رزق بھی عطا کیا ہے»

            یعنی پھر مجھے اللہ نے نبوت اور رسالت سے بھی سرفراز فرما دیا ہے۔

             وَمَآ اُرِیْدُ اَنْ اُخَالِفَکُمْ اِلٰی مَآ اَنْہٰکُمْ عَنْہُ:  «اور میں ہر گز نہیں چاہتا کہ جس چیز سے تم لوگوں کو منع کروں خود وہی کام کروں۔ »

             اِنْ اُرِیْدُ اِلاَّ الْاِصْلَاحَ مَا اسْتَطَعْتُ وَمَا تَوْفِیْقِیْٓ اِلاَّ بِاللّٰہِ:  «میں تو کچھ نہیں چاہتا سوائے اصلاح کے جس قدر مجھ میں استطاعت ہے، اور میری توفیق تو اللہ ہی کی طرف سے ہے۔ »

            میرا مقصد تم لوگوں کی اصلاح ہے اور اس سلسلے میں جو کچھ بھی میں کر رہا ہوں وہ اللہ کی توفیق ہی سے کر رہا ہوں۔  اسی نے مجھے ہمت اور استقامت سے نوازا ہے۔

             عَلَیْہِ تَوَکَّلْتُ وَاِلَیْہِ اُنِیْبُ:  «اُسی پر میں نے توکل ّکیا ہے اور اُسی کی طرف میں رجوع کرتا ہوں۔»