آیت ۹۷: اَلْاَعْرَابُ اَشَدُّ کُفْرًا وَّنِفَاقًا وَّاَجْدَرُ اَلاَّ یَعْلَمُوْا حُدُوْدَ مَآ اَنْزَلَ اللّٰہُ عَلٰی رَسُوْلِہ وَاللّٰہُ عَلِیْمٌ حَکِیْمٌ: ‘‘یہ بدو لوگ کفر و نفاق میں زیادہ سخت ہیں اور زیادہ اس لائق ہیں کہ نا واقف ہوں اُس چیز کی حدود سے جو اللہ نے اپنے رسول پر نازل فرمائی ہے۔ اور اللہ سب کچھ جاننے والا‘ کمال حکمت والا ہے۔‘‘

            یعنی اہل مدینہ تو مسلسل رسول اللہ کی صحبت سے فیض یاب ہو رہے تھے‘ آپ سے جمعہ کے خطبات سنتے تھے اور آپ کی نصیحت کا ایک سلسلہ شب و روز ان کے درمیان چلتا رہتا تھا۔ مگر ان بادیہ نشین لوگوں کو تعلیم و تعلّم کے ایسے مواقع میسر نہیں تھے۔ لہٰذا فطری اور منطقی طور پر کفر و شرک اور نفاق کی شدت ان لوگوں میں نسبتاً زیادہ تھی۔