آیت ۲۹   قَالَ لَئِنِ اتَّخَذْتَ اِلٰہًا غَیْرِیْ لَاَجْعَلَنَّکَ مِنَ الْمَسْجُوْنِیْنَ: ’’اُس نے کہا کہ اگر تم نے میرے سوا کسی اور کو معبود مانا تو میں تمہیں قیدیوں میں داخل کر دوں گا۔‘‘

      صورتِ حال فرعون کی برداشت سے باہر ہو گئی تو اس کا غصہ اور مطلق العنانیت کا جلال اس کی ّخفت پر غالب آگیا۔ اس کیفیت میں اس نے گرجتے ہوئے حضرت موسیٰ کو دھمکی دی، مگر یہ قتل کے بجائے صرف جیل میں ڈالنے کی دھمکی تھی۔ اس سے یوں لگتا ہے جیسے ابھی تک فرعون کے دل میں حضرت موسیٰ کے لیے کوئی نرم گوشہ موجود تھا اور یہ بالکل فطری بات تھی، کیونکہ وہ حضرت موسیٰؑ کا بچپن کا ساتھی تھا۔ دونوں اکٹھے کھیلے اور ایک ساتھ پلے بڑھے تھے۔ حضرت موسیٰ عمر میں بڑے ہونے کی وجہ سے اس کے بڑے بھائی کی طرح تھے۔