آیت 116:    وَقَالُوا اتَّخَذَ اللّٰہُ وَلَدًالا سُبْحٰنَہ:   اور ان (میں وہ بھی ہیں جن) کا قول ہے کہ اللہ نے کسی کو بیٹا بنایا ہے۔ وہ تو ان باتوں سے پاک ہے۔  

            ظاہر بات ہے یہاں پھر اہل مکہ ہی کی طرف اشارہ ہو رہا ہے جن کا یہ قول تھا کہ اللہ نے اپنے لیے اولاد اختیار کی ہے۔ وہ کہتے تھے کہ فرشتے اللہ کی بیٹیاں ہیں۔ نصاریٰ کہتے تھے کہ مسیح  اللہ کے بیٹے ہیں،  اور یہودیوں کا بھی ایک گروہ ایسا تھا جو حضرت عزیر کو اللہ کا بیٹا کہتا تھا۔

             بَلْ لَّہ مَا فِی السَّمٰوٰتِ وَالْاَرْضِ:    بلکہ آسمانوں اور زمین میں جو کچھ ہے اُسی کی ملکیت ہے۔  

            سب مخلوق اور مملوک ہیں،  خالق اور مالک صرف وہ ہے ۔

             کُلٌّ لَّہ قٰـنِتُوْنَ:   سب کے سب اسی کے مطیع فرمان ہیں۔  

            بڑے سے بڑا رسول ہو یا بڑے سے بڑا ولی یا بڑے سے بڑا فرشتہ یا بڑے بڑے اَجرامِ سماویہ،  سب اسی کے حکم کے پابند ہیں۔