محمّـد

یہ فرماں برداری کا اظہار اور اچھی اچھی باتیں کرتے ہیں ، لیکن جب (جہاد کا) حکم پکا ہو جائے، اُس وقت اگر یہ اﷲ کے ساتھ سچے نکلیں تو ان کے حق میں اچھا ہو 

پھر اگر تم نے (جہاد سے) منہ موڑا تو تم سے کیا توقع رکھی جائے؟ یہی کہ تم زمین میں فساد مچاؤ، اور اپنے خونی رشتے کاٹ ڈالو !

یہ وہ لوگ ہیں جن کو اﷲ نے اپنی رحمت سے دُور کردیا ہے، چنانچہ اُنہیں بہرا بنا دیا ہے، اور ان کی آنکھیں اندھی کر دی ہیں

بھلا کیا یہ لوگ قرآن پر غور نہیں کرتے، یادلوں پر وہ تالے پڑے ہوئے ہیں جو دلوں پر پڑا کرتے ہیں؟

حقیقت یہ ہے کہ جو لوگ حق بات سے پیٹھ پھیر کر مڑ گئے ہیں ، باوجودیکہ ہدایت اُن کے سامنے خوب واضح ہو چکی تھی، اُنہیں شیطان نے پٹی پڑھائی ہے، اور اُنہیں دُور دراز کی اُمیدیں دِلائی ہیں

یہ سب اس لئے ہوا کہ جو لوگ اﷲ کی نازل کی ہوئی باتوں کو پسند کرتے ہیں ، ان (منافقوں ) نے اُن سے یہ کہا ہے کہ : ’’ بعض معاملات میں ہم تمہاری بات مانیں گے۔‘‘ اور ا ﷲ ان کی خفیہ باتوں کوخوب جانتا ہے

پھر اس وقت ان کا کیا حال بنے گا جب فرشتے ان کی رُوح اس طرح قبض کریں گے کہ ان کے چہروں پر اور پیٹھوں پر مارتے جاتے ہوں گے؟

یہ سب اس لئے کہ یہ اس طریقے پر چلے جس نے اﷲ کو ناراض کیا، اور اُس کی رضامندی حاصل کرنے کو خود انہوں نے ناپسند کیا، اس لئے اﷲ نے ان کے اعمال اکارت کر دیئے

جن لوگوں کے دلوں میں (نفاق کا) روگ ہے، کیا وہ سمجھتے ہیں کہ اُن کے چھپے ہوئے کینوں کو اﷲ کبھی ظاہر نہیں کرے گا؟

اور (مسلمانو !) اگر ہم چاہیں تو تمہیں یہ لوگ اس طرح دکھادیں کہ تم اُن کی علامت سے اُنہیں پہچان جاؤ، اور (اب بھی) تم اُنہیں بات کرنے کے ڈھب سے ضرور پہچان ہی جاؤ گے، اور اﷲ تم سب کے اعمال کو خوب جانتا ہے