الأحزاب

اور تم میں سے جو کوئی اﷲ اور اُس کے رسول کی تابع دار رہے گی، اور نیک عمل کرے گی، اُسے ہم اُس کا ثواب بھی دوگنا دیں گے، اور اُس کیلئے ہم نے باعزت رزق تیار کر رکھا ہے

اے نبی کی بیویو! اگر تم تقویٰ اِختیار کروتو تم عام عورتوں کی طرح نہیں ہو۔ لہٰذا تم نزاکت کے ساتھ بات مت کیا کرو، کبھی کوئی ایسا شخص بیجا لالچ کرنے لگے جس کے دل میں روگ ہوتا ہے، اور بات وہ کہو جو بھلائی والی ہو

اور اپنے گھروں میں قرار کے ساتھ رہو، اور (غیر مردوں کو) بناؤ سنگھار دکھاتی نہ پھرو، جیسا کہ پہلی جاہلیت میں دکھایا جاتا تھا، اور نماز قائم کرو، اور زکوٰۃ اداکرو، اور اﷲ اور اُس کے رسول کی فرماں برداری کرو۔ اے نبی کے اہلِ بیت ! (گھر والو) اﷲ تو یہ چاہتا ہے کہ تم سے گندگی کو دُور رکھے، اور تمہیں ایسی پاکیزگی عطا کرے جو ہر طرح مکمل ہو

اور تمہارے گھروں میں اﷲ کی جو آیتیں اور حکمت کی جو باتیں سنائی جاتی ہیں ، اُن کو یاد رکھو۔ یقین جانو اﷲ بہت باریک بین اور ہر بات سے باخبر ہے

بیشک فرماں بردار مرد ہوں یا فرماں بردار عورتیں ، مومن مرد ہوں یا مومن عورتیں ، عبادت گذار مرد ہوں یا عبادت گذار عورتیں ، سچے مرد ہوں یا سچی عورتیں ، دل سے جھکنے والے مرد ہوں یا دل سے جھکنے والی عورتیں ، صدقہ کرنے والے مرد ہوں یا صدقہ کرنے والی عورتیں ، روزہ دار مرد ہوں یا روزہ دار عورتیں ، اپنی شرم گاہوں کی حفاظت کرنے والے مرد ہوں یا حفاظت کرنے والی عورتیں ، اور اﷲ کا کثرت سے ذکر کرنے والے مرد ہوں یا ذکر کرنے والی عورتیں ، ان سب کیلئے اﷲ نے مغفرت اور شاندار اَجر تیار کر رکھا ہے

اور جب اﷲ اور اُس کا رسول کسی بات کا حتمی فیصلہ کردیں تو نہ کسی مومن مرد کیلئے یہ گنجائش ہے، نہ کسی مومن عورت کیلئے کہ اُن کو اپنے معاملے میں کوئی اختیار باقی رہے۔ اور جس کسی نے اﷲ اور اُس کے رسول کی نافرمانی کی، وہ کھلی گمراہی میں پڑگیا

اور (اے پیغمبر !) یاد کرو جب تم اُس شخص سے جس پر اﷲ نے بھی احسان کیا تھا، اور تم نے بھی احسان کیا تھا، یہ کہہ رہے تھے کہ : ’’ اپنی بیوی کو اپنے نکاح میں رہنے دو، اور اﷲ سے ڈرو، اور تم اپنے دل میں وہ بات چھپائے ہوئے تھے جسے اﷲ کھول دینے والا تھا، اور تم لوگوں سے ڈرتے تھے، حالانکہ اﷲ اس بات کا زیادہ حق دار ہے کہ تم اُس سے ڈرو۔ پھر جب زید نے اپنی بیوی سے تعلق ختم کر لیا تو ہم نے اُس سے تمہار ا نکاح کرادیا، تاکہ مسلمانوں کیلئے اپنے منہ بولے بیٹوں کی بیویوں (سے نکاح کرنے) میں اُس وقت کوئی تنگی نہ رہے جب اُنہوں نے اپنی بیویوں سے تعلق ختم کر لیا ہو۔ اور اﷲ نے جو حکم دیا تھا، اُس پر عمل تو ہو کر رہنا ہی تھا

نبی کیلئے اُس کام میں اعتراض کی کوئی بات نہیں ہوتی جو اﷲ نے اُس کیلئے طے کر دیا ہو۔ یہی اﷲ کی وہ سنت ہے جس پر اُن (انبیاء) کے معاملے میں بھی عمل ہوتا آیا ہے جو پہلے گذر چکے ہیں ۔ اور اﷲ کا فیصلہ نپا تلا مقدر ہوتا ہے

پیغمبر وہ لوگ ہیں جو اﷲ کے بھیجے ہوئے اَحکام کو لوگوں تک پہنچاتے ہیں ، اور اُسی سے ڈرتے ہیں ، اور اﷲ کے سوا کسی سے نہیں ڈرتے۔ اور حساب لینے کیلئے اﷲ کو کسی کی ضرورت نہیں

(مسلمانو !) محمد (صلی اللہ علیہ وسلم) تم مردوں میں سے کسی کے باپ نہیں ہیں ، لیکن وہ اﷲ کے رسول ہیں، اور تمام نبیوں میں سب سے آخری نبی ہیں ۔ اور اﷲ ہر بات کو خوب جاننے والا ہے