لقمان

کیا تم نے نہیں دیکھا کہ کشتیاں سمندر میں اﷲ کی مہربانی سے چلتی ہیں ، تاکہ وہ تمہیں اپنی کچھ نشانیاں دکھائے؟ یقینا اس میں ہر اُس شخص کیلئے بہت سی نشانیاں ہیں جو صبر کا پکا، اعلیٰ درجے کا شکر گذار ہو

اور جب موجیں سائبانوں کی طرح اُن پر چڑھ آتی ہیں تو وہ اﷲ کو اس طرح پکارتے ہیں کہ اُس وقت اُن کا اعتقاد خالص اُسی پر ہوتا ہے۔ پھر جب وہ اُن کو بچا کر خشکی پر لے آتا ہے تو اُن میں سے کچھ ہیں جو راہِ راست پر رہتے ہیں (باقی پھر شرک کرنے لگتے ہیں ) اور ہماری آیتوں کا انکار وہی شخص کرتا ہے جو پکا بد عہد، پرلے درجے کا ناشکرا ہو

اے لوگو ! اپنے پروردگار (کی ناراضی) سے بچو، اور ڈرو اُس دن سے جب کوئی باپ اپنے بیٹے کے کام نہیں آئے گا، اور نہ کسی بیٹے کی یہ مجال ہوگی کہ وہ اپنے باپ کے ذرا بھی کام آجائے۔ یقین جانو کہ اﷲ کا وعدہ سچا ہے، اس لئے ایسا ہر گز نہ ہونے پائے کہ یہ دُنیوی زندگی تمہیں دھوکے میں ڈال دے، اور ایسا ہر گز نہ ہونے پائے کہ وہ (شیطان) تمہیں اﷲ کے معاملے میں دھوکے میں ڈال دے جو سب سے بڑا دھوکا باز ہے

یقینا (قیامت کی) گھڑی کا علم ا ﷲ ہی کے پاس ہے، وہی بارش برساتا ہے، اور وہی جانتا ہے کہ ماؤں کے پیٹ میں کیا ہے، اور کسی متنفس کو یہ پتہ نہیں ہے کہ وہ کل کیا کمائے گا، اور نہ کسی متنف کو یہ پتہ ہے کہ کونسی زمین میں اُسے موت آئے گی۔ بیشک اﷲ ہر چیز کامکمل علم رکھنے والا، ہر بات سے پوری طرح باخبر ہے