النمل

اور نہ تم اندھوں کو اُن کی گمراہی سے بچا کر راستے پر لاسکتے ہو۔ تم تو اُنہی لوگوں کو اپنی بات سنا سکتے ہو جو ہماری آیتوں پر ایمان لائیں ، پھر وہی لوگ فرماں بردار ہوں گے

اور جب ہماری بات پوری ہونے کا وقت ان لوگوں پر آپہنچے گا تو ہم ان کیلئے زمین سے ایک جانورنکالیں گے جو ان سے بات کرے گا کہ لوگ ہماری آیتوں پر ایمان نہیں لاتے تھے

اور اُ س دن کو نہ بھولو جب ہم ہر اُمت میں سے اُن لوگوں کی پوری فوج کو گھیر لائیں گے جو ہماری آیتوں کو جھٹلایا کرتے تھے، پھر اُن کی جماعت بندی کی جائے گی

یہاں تک کہ جب سب آجائیں گے تو اﷲ کہے گا کہ : ’’ کیا تم نے میری آیتوں کو پوری طرح سمجھے بغیر ہی جھٹلا دیا تھا، یا کیا کرتے رہے تھے؟‘‘

اور اُنہوں نے جو ظلم کیا تھا، اُس کی وجہ سے اُن پر عذاب کی بات پوری ہوجائے گی، چنانچہ وہ کچھ بول نہیں سکیں گے

کیا اُنہوں نے دیکھا نہیں کہ ہم نے رات اس لئے بنائی ہے کہ وہ اُس میں سکون حاصل کریں ، اور دن اس طرح بنایا ہے کہ اُس میں چیزیں دکھائی دیں؟ یقینا اس میں اُن لوگوں کیلئے بڑی نشانیاں ہیں جو ایمان لاتے ہیں

اور جس دن صور پھونکا جائے گا، تو آسمانوں اور زمین کے سب رہنے والے گھبرا اُٹھیں گے، ۔ سوائے اُن کے جنہیں اﷲ چاہے گا، ۔ اور سب اُس کے پاس جھکے ہوئے حاضر ہوں گے

تم (آج) پہاڑوں کو دیکھتے ہو تو سمجھتے ہو کہ یہ اپنی جگہ جمے ہوئے ہیں ، حالانکہ (اُس وقت) وہ اس طرح پھر رہے ہوں گے جیسے بادل پھرتے ہیں ۔ یہ سب اﷲ کی کاریگری ہے جس نے ہر چیز کو مستحکم طریقے سے بنایا ہے۔ یقینا اُسے پوری خبر ہے کہ تم کیا کام کرتے ہو

جو کوئی نیکی لے کر آئے گا اُسے اُس سے بہتر بدلہ ملے گا، اور ایسے لوگ اُس دن ہر قسم کی گھبراہٹ سے محفوظ ہوں گے

اور جو کوئی برائی لے کر آئے گا، تو ایسے لوگوں کو منہ کے بل آگ میں ڈال دیا جائے گا۔ تمہیں کسی اور بات کی نہیں ، اُنہی اعمال کی سزا دی جائے گی جو تم کیا کرتے تھے