الـصّـف

آسمانوں اور زمین میں جو بھی کوئی چیز ہے، اُس نے اﷲ کی تسبیح کی ہے، اور وہی ہے جو اِقتدار کا بھی مالک ہے، حکمت کا بھی مالک

اے ایمان والو ! تم ایسی بات کیوں کہتے ہو جو کرتے نہیں ہو؟

اﷲ کے نزدیک یہ بات بڑی قابلِ نفرت ہے کہ تم ایسی بات کہو جو کرو نہیں

حقیقت یہ ہے کہ اﷲ اُن لوگون سے محبت کرتا ہے جو اُس کے راستے میں اس طرح صف بنا کر لرتے ہیں جیسے وہ سییسہ پلائی ہوئی عمارت ہوں

اور وہ وقت یاد کرو جب موسیٰ نے اپنی قوم سے کہا تھا کہ : ’’ اے میری قوم کے لوگو ! تم مجھے تکلیف کیوں پہنچاتے ہو، حالانکہ تم جانتے ہو کہ میں تمہارے پاس اﷲ کا پیغمبر بن کر آیا ہوں؟‘‘ پھر جب اُنہوں نے ٹیڑھ اِختیار کی تو اﷲ نے ان کے دلوں کو ٹیڑھا کر دیا، اور اﷲ نافرمان لوگوں کو ہدایت تک نہیں پہنچاتا

اور وہ وقت یاد کرو جب عیسیٰ بن مریم نے کہا تھا کہ : ’’ اے بنو اِسرائیل ! میں تمہارے پاس اﷲ کا ایسا پیغمبر بن کر آیا ہوں کہ مجھ سے پہلے جو تورات (نازل ہوئی) تھی، میں اُس کی تصدیق کرنے والا ہوں ، اور اُس رسول کی خوشخبری دینے والا ہوں جو میرے بعد آئے گا، جس کا نام احمد ہے۔‘‘ پھر جب وہ اُن کے پاس کھلی کھلی نشانیاں لے کر آئے تو وہ کہنے لگے کہ : ’’ یہ تو کھلا ہو ا جادو ہے۔‘‘

اور اُس شخص سے بڑا ظالم کون ہوگا جو اﷲ پر جھوٹ باندھے، جبکہ اُسے اسلام کی طرف بلایا جارہا ہو؟ اور اﷲ ایسے ظالم لوگوں کو ہدایت تک نہیں پہنچاتا

یہ لوگ چاہتے ہیں کہ اپنے منہ سے اﷲ کے نور کو بجھا دیں ، حالانکہ اﷲ اپنے نور کی تکمیل کر کے رہے گا، چاہے کافروں کو یہ بات کتنی بُری لگے

وہی تو ہے جس نے اپنے رسول کو ہدایت اور سچائی کا دین دے کر بھیجا ہے تاکہ وہ اُسے تمام دوسرے دینوں پر غالب کردے، چاہے مشرک لوگوں کو یہ بات کتنی بُری لگے

اے ایمان والو ! کیا میں تمہیں ایک ایسی تجارت کا پتہ دُوں جو تمہیں دردناک عذاب سے نجات دلادے؟