الـحـشـر

آسمانوں اور زمین میں جو بھی کوئی چیز ہے، اُس نے اﷲ کی تسبیح کی ہے، اور وہی ہے جو اِقتدار کا بھی مالک ہے، حکمت کا بھی مالک

وہی ہے جس نے اہلِ کتاب میں سے کافر لوگوں کو اُن کے گھروں سے پہلے اجتماع کے موقع پر نکال دیا۔ (مسلمانو !) تمہیں یہ خیال بھی نہیں تھا کہ وہ نکلیں گے، اور وہ بھی یہ سمجھے ہوئے تھے کہ اُن کے قلعے اﷲ سے بچالیں گے۔ پھر اﷲ اُن کے پاس ایسی جگہ سے آیا جہاں اُن کا گمان بھی نہیں تھا، اور اﷲ نے اُن کے دلوں میں رُعب ڈال دیا کہ وہ اپنے گھروں کو خود اپنے ہاتھوں سے بھی اور مسلمانوں کے ہاتھوں سے بھی اُجاڑ رہے تھے۔ لہٰذا اے آنکھوں والو ! عبرت حاصل کرو

اور اگر اﷲ نے اُن کی قسمت میں جلا وچنی نہ لکھ دی ہوتی تو وہ دُنیا ہی میں اُن کو عذاب دے دیتا، البتہ اُن کیلئے دوزخ کا عذاب ہے۔

یہ اس لئے کہ انہوں نے اﷲ اور اُس کے رسول سے دُشمنی ٹھانی، اور جو شخص اﷲ سے دُشمنی کرتا ہے، تو اﷲ بڑا سخت عذاب دینے والا ہے

تم نے کھجور کے جو درخت کاٹے، یا اُنہیں اپنی جڑوں پر کھڑا رہنے دیا، تو یہ سب کچھ اﷲ کے حکم سے تھا، اور اس لئے تھا تاکہ اﷲ نافرمانوں کو رُسوا کرے

اور اﷲ نے اپنے رسول کو اُن کا جو مال بھی فییٔ کے طور پر دلوایا، اُس کیلئے تم نے نہ اپنے گھوڑے دوڑائے، نہ اُونٹ، لیکن اﷲ اپنے پیغمبروں کو جس پر چاہتا ہے، تسلط عطا فرما دیتا ہے۔ اور اﷲ ہر چیز پر پوری قدرت رکھنے والا ہے۔

اﷲ اپنے رسول کو دُوسری بستیوں سے جو مال بھی فییٔ کے طور پر دلوادے، تو وہ اﷲ کا حق ہے، اور اُس کے رسول کا، اور قرابت داروں کا، اور یتیموں ، مسکینوں اور مسافروں کا، تاکہ وہ مال صرف اُنہی کے درمیان گردش کرتا نہ رہ جائے جو تم میں دولت مند لوگ ہیں ۔ اور رسول تمہیں جوکچھ دیں ، وہ لے لو، اور جس چیز سے منع کریں ، اُس سے رُک جاؤ۔ اور اﷲ سے ڈرتے رہو۔ بیشک اﷲ سخت سزا دینے والا ہے

(نیز یہ مالِ فییٔ) اُن حاجت مند مہاجرین کا حق ہے جنہیں اپنے گھروں اوراپنے مالوں سے بے دخل کیا گیا ہے۔ وہ اﷲ کی طرف سے فضل اور اُس کی خوشنودی کے طلب گار ہیں ، اور اﷲ اور اُس کے رسول کی مدد کرتے ہیں۔ یہی لوگ ہیں جو راست باز ہین

(اور یہ مالِ فییٔ) اُن لوگوں کا حق ہے جو پہلے ہی سے اس جگہ (یعنی مدینہ میں ) اِیمان کے ساتھ مقیم ہیں ، جو کوئی ان کے پاس ہجرت کر کے آتا ہے، یہ اُس سے محبت کرتے ہیں ، اور جو کچھ اُن (مہاجرین) کو دیا جاتا ہے، یہ اپنے سینوں میں اُس کی کوئی خواہش بھی محسوس نہیں کرتے، اور اُن کو اپنے آپ پر ترجیح دیتے ہیں ، چاہے اُن پر تنگ دستی کی حالت گذر رہی ہو۔ اور جو لوگ اپنی طبیعت کے بخل سے محفوظ ہوجائیں ، وہی ہیں جو فلاح پانے والے ہیں

اور (یہ مالِ فییٔ) اُن لوگوں کا بھی حق ہے جو ان (مہاجرین و اَنصار) کے بعد آئے، وہ یہ کہتے ہیں کہ : ’’ اے ہمارے پروردگار ! ہماری بھی مغفرت فرمایئے، اور ہمارے اُن بھائیوں کی بھی جو ہم سے پہلے اِیمان لاچکے ہیں ، اور ہمارے دلوں میں اِیمان لانے والوں کیلئے کوئی بغض نہ رکھئے۔ اے ہمارے پروردگار ! آپ بہت شفیق، بہت مہربان ہیں۔‘‘