الجاثية

حقیقت یہ ہے کہ آسمانوں اور زمین میں ماننے والوں کیلئے بہت سی نشانیاں ہیں

اور خود تمہاری پیدائش میں ، اور اُن جانوروں میں جو اُس نے (زمین میں ) پھیلا رکھے ہیں ، اُن لوگوں کیلئے بڑی نشانیاں ہیں جو یقین کریں

نیز رات اور دن کے آنے جانے میں ، اور اﷲ نے آسمان سے رزق کا جو ذریعہ اُتارا، پھر اُس سے زمین کو اُس کے مردہ ہوجانے کے بعد نئی زندگی دی، اُس میں اور ہواؤں کی گردش میں اُن لوگوں کیلئے بڑی نشانیاں ہیں جو عقل سے کام لیں

یہ اﷲ کی آیتیں ہیں جو ہم تمیں ٹھیک ٹھیک پڑھ کر سنارہے ہیں ۔ اب اﷲ اور اُس کی آیتوں کے بعد کونسی بات ہے جس پر یہ لوگ ایمان لائیں گے؟

بُرا ہو ہر اُس جھوٹے گنہگار کا

جو اﷲ کی آیتیں سنتا ہے جبکہ وہ اُسے پڑھ کر سنائی جارہی ہوتی ہیں ، پھر بھی وہ تکبر کے عالم میں اس طرح (کفر پر) اَڑا رہتا ہے جیسے اُس نے وہ آیتیں سنی ہی نہیں ۔ لہٰذا ایسے شخص کو دردناک عذاب کی ’’ خوشخبری‘‘ سنا دو

اور جب ہماری آیتوں میں سے کوئی آیت ایسے شخص کے علم میں آتی ہے تو وہ اُس کا مذاق بناتا ہے۔ ایسے لوگوں کو وہ عذاب ہوگا جو ذلیل کر کے رکھ دے گا

اُن کے آگے جہنم ہے، اور جو کچھ اُنہوں نے کمایا ہے، نہ وہ اُن کے کچھ کام آئے گا، اور نہ وہ کام آئیں گے جن کو اُنہوں نے اﷲ کے بجائے اپنا رکھوالا بنا رکھا ہے۔ اور اُن کے حصے میں ایک زبردست عذاب آئے گا

یہ (قرآن) سراپا ہدایت ہے، اور جن لوگوں نے اپنے پروردگار کی آیتوں کا انکار کیا ہے، اُن کیلئے بلا کا دردناک عذاب ہے