آیت 235:    وَلاَ جُنَاحَ عَلَیْکُمْ فِیْمَا عَرَّضْتُمْ بِہ مِنْ خِطْبَۃِ النِّسَآءِ اَوْ اَکْنَنْتُمْ فِیْ اَنْفُسِکُمْ :   «اور تم پر کچھ گناہ نہیں ہے اس میں کہ کنایہ و اشارہ میں ظاہر کر دو اُن عورتوں سے پیغامِ نکاح یا پوشیدہ رکھو اپنے دلوں میں۔ »

            کسی عورت کا عدت کے دوران نکاح تو نہیں ہو سکتا ‘ نہ ہی اسے واضح طور پر پیغامِ نکاح دیا جا سکتا ہے‘ البتہ اشارے کنائے میں یہ بات کہی جا سکتی ہے کہ مجھے اس میں دلچسپی ہے۔  یا پھر یہ بات اپنے دل ہی میں پوشیدہ رکھی جائے اور عدت ختم ہونے کا انتظار کیا جائے۔  

             عَلِمَ اللّٰہُ اَنَّـکُمْ سَتَذْکُرُوْنَہُنَّ :   «اللہ کو معلوم ہے کہ تم ان عورتوں کا ذکر کرو گے»

            آخر تمہیں ان کا خیال تو آئے گا کہ یہ عورت بیوہ ہو گئی ہے‘ اب میں اس سے شادی کر سکتا ہوں۔  کوئی آدمی یہ بھی سوچ سکتا ہے کہ یہ جو میرے دل میں بیوہ کے بارے میں خیال آ رہا ہے اور اس سے نکاح کی رغبت پیدا ہو رہی ہے تو شاید میں گناہگار ہو گیا ہوں۔  یہاں اطمینان دلایا جا رہا ہے کہ ایسے خیال کا آنا گناہ نہیں ہے‘ یہ قانونِ فطرت ہے۔  

             وَلٰـکِنْ لاَّ تُوَاعِدُوْہُنَّ سِرًّا :   «لیکن ان سے نکاح کا وعدہ نہ کررکھو چھپ کر»

            ایسا نہ ہو کہ خفیہ ہی خفیہ نکاح کی بات پکی ّہو جائے ۔

             اِلَّا اَنْ تَقُوْلُوْا قَوْلاً مَّعْرُوْفًا :   «سوائے اس کے کہ کوئی بات کہہ دو معروف طریقے سے۔ »

            بس کوئی ایسی معروف بات کہہ سکتے ہو جس سے انہیں اشارہ مل جائے۔

             وَلاَ تَعْزِمُوْا عُقْدَۃَ النِّکَاحِ حَتّٰی یَبْلُغَ الْکِتٰبُ اَجَلَہٗط :   «اور مت باندھو گرہ نکاح کی جب تک کہ قانونِ شریعت اپنی مدت کو نہ پہنچ جائے۔ »

            یعنی اللہ کی مقرر کردہ عدت جب تک پوری نہ ہو جائے۔  یہاں کتاب سے مراد قانونِ شریعت ہے۔  کتاب اللہ میں بیوہ کی عدت چار ماہ دس دن مقرر کر دی گئی‘ اس کا پورا ہونا ضروری ہے‘ اس سے پہلے نکاح نہیں ہو سکتا۔  

             وَاعْلَمُوْٓا اَنَّ اللّٰہَ یَعْلَمُ مَا فِیْ اَنْفُسِکُمْ فَاحْذَرُوْہُ :   «اور جان رکھو کہ اللہ خوب جانتا ہے جو کچھ تمہارے دلوں میں ہے‘ پس اُس سے ڈرتے رہو۔ »

            اُس کی پکڑ سے بچنے کی کوشش کرو۔

             وَاعْلَمُوْٓا اَنَّ اللّٰہَ غَفُوْرٌ حَلِیْمٌ :   «اور یہ بھی جان رکھو کہ اللہ بخشنے والا اور ُبردبار ہے۔ »

            اللہ غفور ہے‘ بخشنے والا ہے‘ کوئی خطا ہو گئی ہے تو استغفار کرو‘ تو بہ کرو‘ اللہ معاف فرمائے گا۔  اور وہ حلیم ہے‘ تحمل کرنے والا ہے‘ فوراً نہیں پکڑتا‘ بلکہ ڈھیل دیتا ہے‘ مہلت دیتا ہے کہ اگر چاہو توتم توبہ کرلو۔